48 មតិ

អំពីស្មៅ

អាទិត្យ ២៩ មករា ២០១២

វិលចុះវិល​ឡើង ត្រឡប់មកវិញ​ដដែល ត្រឡប់មករអ៊ូដូច​ដើម…

ដំណើរជីវិតផ្លាស់ប្តូរ​ ប្តូរ​ពី​របត់​មួយ ចូល​របត់មួយ​ទៀត មិន​ដឹង​ថា​របត់​នេះ ខ្ញុំត្រូវ​ហែល​ឆ្លង​ទឹកភ្នែករបស់ខ្លួន​ឯងប៉ុន្មាន​តំណក់​ទៀត​ទៅ? ហើយ​តើ​ត្រូវ​ជូតទឹកមាត់​ខ្លួន​ឯងប៉ុន្មាន​ដង​ទៀត​ដែរ? ហ៊ឺម…

និយាយ​ពី​មូល​ហេតុ​ត្រឡប់​​មកវិញ…

បន្ទាប់​ពី​លុប​ប្លក់​ចាស់ចោល​ជាងប៉ុន្មានខែមុន​នេះ មិន​ដឹង​ថា ប្លក់ដែល​ទើប​បង្កើត​នៅ​ក្នុង​ថ្ងៃនេះ នឹង​ត្រូវ​លុប​ក្នុង​ថ្ងៃណា​មួយ​វិញ​នោះ​ទេ…

ដោយ​ហេតុ​តែ​ខ្ជិល​សរសេររឿង​រ៉ាវពិបាក​ចិត្ត នៅ​ក្នុង​សៀវភៅ ​អក្សរមិន​ស្អាត ហើយ​ណាមួយ ចង់សន្សំ​សំចៃ​ថ្លៃទឹក​ប៊ិច​​ និង​ក្រដាសទៀត​នោះ​ ក៏ស​ម្រេចចិត្ត​ត្រឡប់មកវិញ ព្រោះបើ​​រអ៊ូ​ដាក់​តែ​សៀវភៅ មិន​សូវ​ស្រណុកចិត្ត​ បើ​រអ៊ូ​ដាក់ប្លក់ គ្រាន់​បាន​អ្នក​មាន​និស្ស័យ​ ជួយ​លួងឲ្យ​ធូរ​ទ្រូង​…

ការណែនាំ​ខ្លួន….

ជា​អតីតនាម និងម្ចាស់ប្លក់ «ផ្កាយ​ដុះកន្ទុយ» (តែ​បច្ចុប្បន្ន​ ត្រូវបាន​លុប​ចោល​ហើយ)។​

បុព្វហេតុ​នៃការដាក់​ឈ្មោះ៖

បុព្វហេតុ​ទី​មួយ៖ ដោយ​សារ​យល់​ថា ដំណើរ​ជីវិតខ្លួន​ជា​តំណក់​ឈាមអពមង្គល និង​ជាមេនាំស៊យ​ដល់​គ្រួសារ។

បុព្វហេតុ​ទីពីរ៖ តាមសំនួន​ភាសាលេងសើច «ផ្កាយ​ដុះកន្ទុយ» គេ​និយម​ចូល​​ចិត្ត​​ហៅ​​បញ្ច្រាស់ន័យ ដោយ​ពី​ «ផ្កាយ​ដុះកន្ទុយ» ទៅ​ «ផ្កាយ​អត់កន្ទុយ»។ តាមរយៈសំនួន​លេង​សើច​នេះ ខ្ញុំ​ក៏​សម្រេច​យក​ឈ្មោះ​នេះ ដោយ​ហេតុថា បើអក្សរ «​ផ្កាយ​​» អត់កន្ទុយ (អត់​អក្សរ «យ») នោះ​វា​នឹង​ចេញ​អក្សរជា​ «ផ្កា»។ ឈ្មោះនៅ​សាលា​របស់ខ្ញុំ មាន​ន័យ​ថា ផ្កា តែ​មិន​បាន​សរសេរ​ជាព្យាង្គតម្រួត​ (បុប្ផា) នោះ​ទេ។ សូម​បញ្ជាក់​ផង​ដែរ​ ម៉ាក់របស់​ខ្ញុំ ជា​នារី​ដែល​ចូល​ចិត្ត​ផ្កា ដូច្នេះ​ហើយ បាន​ជា​គាត់​ដាក់​ឈ្មោះ​ដែល​តំណាង​ឲ្យផ្កា ក្នុង​ឧបទ្វីប​ទាំងមូល​ឲ្យ​​ខ្ញុំ។​

បុព្វហេតុ​ទី​បី៖ និយាយ​ពី​បុព្វហេតុ​ចុងក្រោយ​នេះ គួរ​តែ​សួរ​តែ​អ្នក​វិញថា តើ​អ្នកធ្លាប់​ញ៉ាំ​ទឹកកក​​ឈូស​ដាក់​ដើម​ទេ? បើ​ធ្លាប់ អ្នក​ប្រហែល​ជា​នឹង​យល់​ពី​បុព្វហេតុ​នេះ។​ ខ្ញុំ​ជា​មនុស្ស​​ចូលចិត្ត​ញ៉ាំទឹក​កក​ឈូស តែ​មិន​ចូល​ចិត្ត​ញ៉ាំការ៉េម។ កាលពី​តូច​ ឲ្យ​តែ​ឮ​សូរ​សំឡេង​​ជួង​ទឹកកកឈូស​គ្រីងៗ ដឹង​តែ​ខ្ញុំ​ហា​មាត់​សុំ​លុយ​ម៉ាកមួយ​រយ​ រត់​ទៅ​ទិញ​ហើយ។ ទឹកកក​ឈូស​ មាន​រូប​រាង​ជា​ច្រើន​ផ្សេងៗ​គ្នា​​ តាម​បំណិន​ប្រសប់​របស់​អ្នក​លក់ គេ​ធ្វើ​ពុម្ព ដូចជារូប​ផ្កាយ រូប​បេះដូង រូបទន្សាយ រូប​ផ្កាអី​ហ្នឹងជាដើម។ រូប​ដែល​ខ្ញុំចូល​ចិត្ត និង​ស្រឡាញ់​ជាងគេ គឺផ្កាយ។ ទឹក​កក​ឈូស ​ដាក់​ពុម្ពជារូប​រាង​ផ្កាយ ថែម​ទាំង​ដោតឈើ ចាក់ទឹកស៊ីរ៉ូ​ អែមៗ។ ឃើញ​ពាក្យ​«ផ្កាយដុះកន្ទុយ» ធ្វើ​ឲ្យ​ខ្ញុំ​នឹកដល់​ទឹក​កក​ឈូសដោត​ដើម ដោយ​សណ្ឋាន​វា​ស្រដៀងៗ​គ្នា។

ក៏​មាន​នាម​ថា​​ «អាពៅ» (Ah Pov) ផង​ដែរ

និយាយ​ពី​គណនី​ហ្វេស​ប៊ុក ខ្ញុំមាន​ពីរ មួយ​ឈ្មោះ​នៅ​សាលា​ និងមួយ​ទៀត ដាក់​ឈ្មោះ​នៅ​ផ្ទះ។ តែ​មិន​ប្រាកដថា​ ជា​ឈ្មោះ​នៅ​ផ្ទះ​ដែរ​ ដូច្នេះ​​សូមអាន​បុព្វហេតុ​ខាងក្រោម៖

បុព្វហេតុ​ទី​មួយ៖ ខ្ញុំ​មាន​ឈ្មោះកំណើតជាភាសាកន្តាំង ពៅ​យុក (宝玉) ជា​ភាសា​​កុក​ងឺ អាន​ថា ប៉ោ​អ៊ិ។ តែ​ខ្ញុំ​ និងបងស្រី​ជីដូន​មួយ​របស់​ខ្ញុំ មាន​ឈ្មោះ​ស្រដៀង​គ្នា។​​ មួយ​«ពៅ​យុក» មួយ​«ភួយ​យុក» (ត្រូវ​ថែម​នឹង​ឈ្មោះ​ក្មួយ​ស្រី​ខ្ញុំ​ទៀត កន្ទុយ​ «យុក» ដែរ) បើ​ចាស់ៗ​ហៅ​តែ​ឈ្មោះ​ចុង​កន្ទុយ ដូច​ជា​ «អាយុកៗ»ហ្នឹង​ ពីរ​នាក់​ខ្ញុំ ច្បាស់​ជា​វង្វេង​ជា​មិន​ខាន។ ដើម្បី​ជា​សម្គាល់ ខ្ញុំយក​ឈ្មោះកណ្តាល​​ «ពៅ» សម្រាប់​តំណាង។

បុព្វហេតុ​ទីពីរ៖ ខ្ញុំជា​កូន​ពៅ នៅ​ក្នុង​គ្រួសារ (តែ​​ធាតុ​ពិត ដូច​ជា​កូន​ទោល​នៅ​ក្នុង​គ្រួសារ​ត្រឹម​ត្រូវ​ជាង ព្រោះ​តាំងពី​កើតមក នៅ​តែ​ពីរនាក់​ម៉ាក់)។

បុព្វហេតុ​ទី​បី៖ ខ្ញុំចូល​ចិត្ត​ឲ្យ​គេ​ហៅ​ថា «អាពៅ» ជាជាងឈ្មោះ​នៅ​សាលា​ចិន និងនៅ​សាលា​​ខ្មែរ។​

ឈ្មោះ​នៅ​ប្លក់​នេះ សុំដាក់​ថា «ស្មៅ»។ បុព្វហេតុ​នៅ​ក្នុង​ការ​ដាក់​ឈ្មោះ​នេះ មិន​សូវ​មាន​ច្រើន​ណាស់​​ណា​ទេ ព្រោះ​ទើប​តែ​នឹក​ឃើញ​ប៉ុន្មាន​ម៉ោងនេះឯង។

បុព្វហេតុ​ទីមួយ៖ ក្នុងការបង្កើតប្លក់នេះ ចង់​ធ្វើ​ឲ្យ​ដាច់ដោយ​ឡែក​ពីប្លក់​ចាស់ៗ ទើប​ខំ​ចង់​ដាក់​​ឈ្មោះ​ថ្មី។

បុព្វហេតុ​ទី​ពីរ៖ កាលពីម្សិលម៉្ងៃ ម៉ាក់ក៏​ស្រាប់​តែ​សួរ​ខ្ញុំថា ខ្ញុំ​ចង់​បាន​ឈ្មោះ​ថា «ស៊ូ» (ជា​ភាសាចិនកុកងឺ 树 មាន​ន័យ​ថា ដើម​ឈើ) អត់? ខ្ញុំក៏​ឆ្លើយ​ថា «ឈ្មោះ​អ្វី​ក៏​បាន​ ឲ្យ​តែ​ម៉ាក់​ហៅ កូន​ពេញ​ចិត្ត​ទាំងអស់​។ ឈ្មោះមិន​សំខាន់ តែទឹក​ចិត្ត​នៃ​ការ​ហៅ​នឹក​រំលឹកទៅវិញ​ទេ ដែល​សំខាន់»។​  មុន​ដំបូង​​ចង់ដាក់​ឈ្មោះ​​ថា «​​ដើមឈើ» នេះ  ដោយ​សង្ឃឹម​ថា នឹងអាចក្លាយ​ជា​មនុស្ស​មានប្រយោជន៍​ម្នាក់​ ដូច​ដើម​ឈើចឹង​ តែ​​គិត​ឲ្យ​សព្វទៅៗ មនុស្ស​ចរិតមិន​គ្រប់​តឹកដូច​ខ្ញុំ​នេះ ដូច​ជា​ការស្រមើស្រមៃ​ដ៏​ធំធេងពេក ដែល​ចង់​ក្លាយ​ទៅ​ជា​ដើមឈើ ព្រោះ​បើ​ផ្អែក​ទៅ​លើ​ចំណេះ​ដឹង និងសមត្ថភាព​សព្វថ្ងៃ​ នៅ​តូចទាបណាស់ មិន​អាចលូត​ក្លាយ​ជា​ដើមឈើ​ដ៏​ត្រឈឹមត្រឈៃ ផ្តល់ជម្រក ផ្តល់ម្លប់បាន​នោះទេ។ តែ​បើ​មិន​បាន​ត្រឹមជា​ដើមឈើ ក៏​សុំ​ត្រឹមតែ​​ជា​ស្មៅ ព្រោះ​​ស្មៅ​យ៉ាង​ហោច​​ណាស់ ក៏​បាន​ឲ្យ​គោ​ទំពារអៀង​​ចម្អែតក្រពះ​បាន​​ដែរ។ តើ​មែន​ទេ?

​​បុព្វហេតុ​ទី​បី៖ ពាក្យ​ថា «ស្មៅ​» ត្រូវបាន​គេ​ចែក​ចេញ​ជា​ពីរ ដោយ​មួយ​តំណាង​​ឲ្យ​រុក្ខជាតិ​ឈ្មោះ​ថា​«ស្មៅ»តែម្តង និង​មួយ​ទៀត តំណាង​ឲ្យ​រុក្ខជាតិ​ទាំង​មូល ដែ​ល​ស្ថិត​នៅ​ក្នុង​ពពួក​រុក្ខជាតិ​ស្មៅ ដោយ​ក្នុង​នោះ​មាន ស្រូវ ស្បូវ ស្លឹកគ្រៃជាដើម។ បើ​និយាយ​ពី​រុក្ខជាតិ​ស្មៅ ជា​រុក្ខជាតិ​ ដែល​ជីវិត​ថ្លៃ តស៊ូ អំណត់អត់​ធត់ មិន​ខ្លាច​ សូម្បី​តែ​មនុស្ស​ដើរ​ជាន់​ហើយ ក៏​នៅ​​តែ​មុខ​ក្រាស់​ ងើប​ឡើង​ ធ្វើ​ដូច​ជា​ធម្មតា។ បើ​ស្មៅ​ដុះ​នៅ​ទីណា​ហើយ កុំ​សង្ឃឹម​ថា កម្ចាត់​​វា​បា​​ន​ដោយ​ងាយ​​ បើ​អ្នក​មិន​​យក​ទឹក​អំបិលទៅ​ស្រោច​ ឬ​ក៏​យក​វាចេញ​​ ទាំង​ឬស​ចោល​នោះ​​ទេ ដូច​សុភាសិតបុរាណចិន បាន​ពោល​ថា «បើ​ចង់ជីកស្មៅ ត្រូវ​ជីក​ទាំង​ឬស»។ ខ្ញុំ​ចង់​ធ្វើ​ជាមនុស្ស​ដូច​ជា​ស្មៅ​ចឹង។ មនុស្ស​មុខ​ក្រាស់? ហាហាហា

អំពី​ប្លក់

ប្លក់​នេះ គឺ​ជា​សមិទ្ធិផល​នៃតំណក់​ទឹក​ស្គ្រីន (screen) ​បូករួមទាំង​កម្លាំង​ដៃ​វាយ​ឃីប៊ត (keyboard) និង​មនោសញ្ចេតនា​​​របស់​មនុស្សម្នាក់​ ក្នុង​ចំណោម​មនុស្ស​ជាងប្រាំពីរពាន់​លាន​នាក់ ដែលមាន​វត្តមាន​នាពេល​នេះ។

ប្លក់ «ស្មៅ» របត់​ជីវិត​ថ្មីរបស់ខ្ញុំ​ មិន​ដឹង​ថា​នឹង​ពាំនាំ​រឿងសប្បាយៗ ច្រើន​ជាង​រឿង​កើតទុក្ខ ឬ​ក៏​យ៉ាងណា​។ មាន​តែ​ចាំមើល​ទាំងអស់គ្នា បាន​ដឹង?

48 comments on “អំពីស្មៅ

  1. សុំសរសើរ… សរសេរ​បានក្បោះក្បាយល្អ…

  2. នេះគេហៅថា ស្មៅជើងក្រាស តែហៅថា ស្មៅមុខក្រាស ក៏បានដែរ ទៅហើយមកវិញដោយសារតែបង !

  3. អ្នកសរសេរប្លក់នេះគឺជាស្រី 😀

  4. យី ផ្កាយ​ដុះកន្ទុយសោះ ស្មានថានរណាគេ …. បូផាររីកស្គុះស្គាយក្នុងសួនស្មៅ ^_^

  5. អូរ!ស្មានតែនរណា បុផ្ផា សោះមិនបានអានប្រវត្តិអំពីប្លក់គេទើបតែចង់ដឹងអានមើលទើបដឹងថា បុផ្ផាកញ្ញាក្បាលខូចសោះ។បងពិតជាសុំសរសើរដោះស្មោះមែនប្អូនពិតជាពូកែសរសេររៀបរាបក្បោះក្បាយពិតមែនសមជាសិស្សសំណព្វបងតារាឬទ្ធិមែន។បងអានប្លក់ប្អូនហើយសែនខ្មាសខ្លួនឯងណាស់ចង់តែលុបប្លក់ ខ្លួនឯងចោលទេព្រោះមិនល្អដូចរបស់គេ។តែទាស់ត្រង់តែថាបងមិនសូវពូកែរកកន្លែងលុបមិនបានប្រាប់បងម្តងតែបងធ្ថើមិនបានម្យ៉ាងមិនពូកែអង់គ្លេសផង។

    បងសូមជូនពរប្អួនបុផ្ផា,អាពៅ,អាយុក…..ឲ្យមានសុខភាពល្អនិងរីករាយពេញក្នុងក្រុមគ្រួសារណា។

    លីម ចំរើន

    • កុំចឹងអី​បង! អ្វីៗ​សុទ្ធ​តែ​មាន​ចំនុច​ចាប់​ផ្តើម​របស់​វា។ កុំភ្លេចណា ត្រូវ​ចេះ​លើក​ទឹក​ចិត្តខ្លួន​ឯង​ជា​ដរាប​នោះ​អី។​ បង​ឯងគិតមើល! ថ្វីត្បិត​តែបង​​មិន​សូវពូកែ​ខាងសរសេរពាក្យ​រាយ​មែន​ពិត តែ​បង​ជាមនុស្ស​ពូកែ​ខាង​ពាក្យ​កាព្យ​នោះ​អី។ តើនរណាអាចដូចបងនោះ? នៅតែងកំណាព្យ​​​សុខៗ​ អាច​បំបែក​ចេញ​ជា​បទ​កាព្យ​ថ្មី៖ «បទ​ក្រប​ចក្រ​វាឡ​មេ​១២​ថ្មី»។ បងគិត​ទៅ​មើល មាន​នរណា​អាច​ធ្វើ​ដូចបង​អត់? ស៊ូៗៗៗ បងខ្ញុំជា​មនុស្សពូកែ!

  6. ស្មៅ ? ធ្វើអោយខ្ញុំនឹកឃើញក្លិនផ្អែមស្រាលមួយបែប
    ខ្ញុំចាំបានថានៅស្រុកខ្មែរយើងមានស្មៅម្យ៉ាង
    ហៅស្មៅក្រអូបព្រោះក្លិនវាក្រអូប ពេលហាលវាស្ងួត
    កាន់តែក្រអូបឡើង …មិនដឹងនៅរកបានទៀតរឺអត់ទេ !
    ឡើយសិនហ៊ា 😀

  7. សួស្តីបងស្មៅ! ខ្ញុំបាទទើបតែស្គាល់វើតប្រេសទេ​ តែចែដន្យវាសនាបានស្គាល់ផ្ទះបង។ ពិតជារំភើបចិត្តណាស់ខ្លាំងណាស់ដែលបានឈានជើងចូលផ្ទះរបស់បង។ ផ្ទះរបស់បងពិតជា កក់ក្តៅ និង​ មានប្រយោជន៏ច្រើនមែន។សូមរាប់អានខ្ញុំផងណា!

  8. ពេលអានកំណាព្យក្នុងប្លក់នេះហើយខ្ញុំហាក់ដូចមានអារម្មណ៍អណ្តែតអណ្តូងនឹកឃើញ នូវដំណើរជីវិតដែលបានជួបប្រទះកន្លងមក។ តែខ្ញុំមានសំនួរមួយតើ «ស្មៅ» ស្គាល់លោក ខូ តារារិទ្ធិរបៀបណាដែរ? ព្រោះគាត់ជាមិត្តភក្តិបងស្រីខ្ញុំ។

  9. ពិតជាចៃដន្យមែន។ មើលទៅ ស្មៅ ហាក់ដូចជាផ្តោតសំខាន់លើឈ្មោះនីមួយៗនិងអត្ថន័យវាណាស់។
    រាល់ឈ្មោះសុទ្ធតែមានប្រវត្តិ ការវិវត្ត និងអត្ថន័យដែលធ្វើឲ្យឈ្មោះកាន់តែមានសារៈសំខាន់​ចំពោះមនុស្ស​ម្នាក់។ ពេលខ្ញុំជួមមិត្តថ្មីខ្ញុំតែងសួរឈ្មោះនិងសួរគេថាតើឈ្មោះអ្នកមានន័យដូចម្តេច? តែស្មៅបានបង្ហាញ​អស់ហើយ។ ចឹងមិនចាំបាច់សួរដែរ។ រីករាយណាស់ដែលបានស្គាល់។

    • ការ​ដាក់​​ឈ្មោះ​ ក្រៅ​ពី​សម្រាប់​សម្គាល់​អត្តសញ្ញាណ​របស់​បុគ្គលម្នាក់​ វាក៏​ជា​គ្រឿងសម្រាប់​សម្គាល់​បុគ្គលិក​លក្ខណៈ​របស់​​បុគ្គល​អ្នក​ដាក់​ឈ្មោះ​ផង​ដែរ។ ដូច​ជាឈ្មោះ​ពីរ​ដែលម្តាយ​ខ្ញុំដាក់​ឲ្យ​ចឹង ឈ្មោះ មួយ​ទន់​ភ្លន់ ដោយ​សង្ឃឹមថា ខ្ញុំនឹង​អាច​ក្លាយ​ទៅ​ជាមនុស្ស​ស្រី​ម្នាក់ ដែល​ទន់ភ្លន់់ រាបសារ និង​អាច​ធ្វើ​ជា​គំរូ​របស់​គេ​បាន។ រីឯឈ្មោះ​មួយ​ទៀត គឺបង្កប់នូវ​អត្ថន័យ​រឹងមាំ និង​មាន​តម្លៃ។ កើតមកជាមនុស្ស ត្រូវ​តែ​រឹងមាំ បើ​ដួល​ហើយ ត្រូវ​តែ​ចេះ​ក្រោក​ឈរ ហើយ​ត្រូវ​តែ​ធ្វើ​ជាមនុស្ស​ឲ្យ​មាន​តម្លៃ​ ទើប​គួរ…

      ឈ្មោះក្រៅ​​របស់Rain ហេហេ… ដូច​ទៅ​នឹង​ឈ្មោះ​ក្រៅ​របស់​មិត្ត​ខ្ញុំម្នាក់ តែមិន​ដឹង​ថា មូល​ហេតុ​ដែល​ដាក់ឈ្មោះចង់ មិន​ដឹងជាដូច​គ្នា​ឬ​អត់។ មិត្តខ្ញុំម្នាក់​នោះ គេថា មូលហេតុ​ដែល​គេ​ថា​ឈ្មោះ​ចឹង ព្រោះ​គេគិត​ថា គេជាមនុស្ស​ប៉ិន​យំហើយ តែនៅ​មាន​អ្នក​ប៉ិន​យំ​​ជាង​គេ​ទៅ​ទៀត នោះ​គឺ​ភ្លៀង។ ចុះចំណែក​យើង​វិញ តើ​មូល​ហេតុ​អី​ដែរ ដែល​បណ្តាល​ឲ្យ​ចិត្ត​ចង់​ដាក់ឈ្មោះ​បែបនេះ?

  10. តាមពិតពេលដែលខ្ញុំកើតមកគឺនៅចំពេលភ្លៀង បានជាលោកយាយខ្ញុំហៅថា «ភ្លៀង» គ្មាននរណាម្នាក់​បកស្រាយអត្ថន័យឈ្មោះនេះអោយខ្ញុំស្តាប់ទេ។ តែពេលមួយក្រោយពីបូកសរុបនូវអ្វីដែល​ឆ្លងកាត់កន្លងមក ឈ្មោះភ្លៀងនេះ សំដៅលើភ្លៀងដែលធ្លាក់នៅក្នុងទីក្រុងព្រោះខ្ញុំកើតនៅក្រុង។ តើស្មៅធ្លាប់សង្កេតឃើញ​ការយល់ឃើញ​ខុសគ្នា​រវាងភ្លៀងទីក្រុងនិងភ្លៀងជនបទដែររឺទេ? ការពិតភ្លៀងតែងតែមាន​បំណង់ល្អចង់ឲ្យមនុស្សមាន​ភាពត្រជាក់ត្រជុំប៉ុន្តែអ្នកទីក្រុងមិនសូវពេញចិត្តភ្លៀង​ប៉ុន្មានទេដែល​ខុសពីអ្នកជនបទ។ សរុបទៅភ្លៀងជាអ្នកដែលមានបំណងល្អតែ មិនមែនបានន័យថាគ្រប់ទង្វើសុទ្ធតែ​បានផលល្អនោះទេ។ ដូចនេះវាអាស្រ័យទីតាំងគេស្ថិតនៅ និងមនុស្សដែលគេនៅក្បែរ។

    • ភិរុណ បក​ស្រាយ​អត្ថន័យ​​ឈ្មោះ​របស់​ខ្លួន ហាក់​ដូច​ជា​ធ្លាប់​ខក​ចិត្ត​ច្រើនដង​អ៊ិចឹង ចំពោះ​អ្វី​ដែល​គេ​មិន​យល់​ពី​បំណងល្អ​របស់​ខ្លួន។ តែ​ឲ្យ​តែ​យើង​ឧស្សាហ៍​បង្អុរ​​ភាព​ត្រជាក់់ត្រជុំ​មក មិន​ប្រាកដ​ថា គេ​មិន​ទទួល​យក​បំណង​ល្អ​របស់​យើង​រហូត​ទេ ដូច​ជាខែ​នេះ​ចឹង ក្តៅ​ណាស់ ចឹងភិរុណ ឆាប់​បញ្ជា​កូន​ចៅ ឲ្យ​បង្អុរ​ភ្លៀង​មួយ​មេមក 😀

  11. ស្វាគមន៍ជាថ្មីណាស្មៅ​​ (ផ្កាយដុះកន្ទុយ) !​

  12. អរគុណហើយស្មៅអើយ។
    ពេលរដូវភ្លៀងមកដល់ប្រាកដជាមានភ្លៀងធ្លាក់ ត្រជាក់ដីមិនខាន។
    ថាមិនត្រូវក្រោយភ្លៀងមានឥន្ធនូឲ្យគយគន់ទៀតផង។

  13. ក្រោយភ្លៀងមេឃស្រលះ ជះពន្លឺឥន្ធនូមិនខាន។

  14. ប្រហែលហើយ។ មនុស្សយើងពេលខ្លះបានមើលរំលងសម្រស់ធម្មជាតិ។
    ទាល់តែអ្នកមានចិត្តចង់ឃើញ ទើបអាចគយគន់សម្រស់វាប្រកបដោយក្តីសោមនស្ស។

  15. ខ្ញុំធ្លាប់ឃើញ ធ្លាប់ជួបប្រទះហើយ ឥន្ទនូនោះ បានថែមទាំងប៉ះវាទៀតផង កណ្តាលថ្ងៃនៅស្រុកខ្ញុំឯនេះ អស្ចារ្យមេន ឃើញខៀងលឿងបៃតង ពណ៌ចំរុះស្អាតល្អអស្ចារ្យ ចំឡែកមែនថ្ងៃនោះ កំពុងតែដើរយាមល្បាត នៅផ្សារមួយកណ្តាលក្រុងតែម្តង ប៉ុន្តែ ប៉ុន្តែ ប៉ុន្មានអាទិត្យក្រោយមក មានឡានគេមួយបានបើក ទៅបុកចំ ដើមឈើដែលឥន្ទនូចុះហ្នឹងស្លាប់ទៅ ចំឡែកមែន ផ្លូវហ្នឹងមិនជាផ្លូវបើកលឿនណាស់ទេ ល្មមៗ ប្រហែលជា ៦០-៧០ គីឡូម៉េត្រក្នុង ១ ម៉ោង កន្លែងនោះហើយ ក្មេងៗស្រី ៗជំទង់ នាំគ្នាដេញចាប់ខ្ញុំថើប រត់មិនរួច ដល់តែ ហៅប៉ូលិសអោយជួយ 🙂 មិនបានទេ វាមានកាម៉ារ៉ា អាមួយអ្នកថត អាមួយអ្នកចាប់ ថ្ងៃក្រោយ វាយករូបថតមកអោយមើលទៀត អត់ទាស់តាហ្មង។៚…

  16. យី ការពិតជាផ្កាយដុះកន្ទុយ អ្នកស្រុកអ្នកភូមិចាស់តើនៀក ក្នុងផ្ទះខ្ញុំមានតំណរភ្ជាប់ដែរ​ ចឹងទើបចូលលេង រកផ្ទះមិនឃើញសោះ។ 😀

  17. សុំសួស្តីមួយ!

  18. ស្មៅ អី ឯណាទៀតហើយ? រញ៉េរញ៉ៃណាស់ ផ្កាយ …

  19. ដូរ​ឈ្មោះ ដូរ​ប្លក់​ច្រើន​ដល់ហើយនៀក មិន​ដឹង​សោះ​ថា​ជា​អ្នក​ភូមិ​ចាស់

ឆ្លើយ​តប

Fill in your details below or click an icon to log in:

ឡូហ្កូ WordPress.com

អ្នក​កំពុង​បញ្ចេញ​មតិ​ដោយ​ប្រើ​គណនី WordPress.com របស់​អ្នក​។ Log Out /  ផ្លាស់ប្តូរ )

Google photo

អ្នក​កំពុង​បញ្ចេញ​មតិ​ដោយ​ប្រើ​គណនី Google របស់​អ្នក​។ Log Out /  ផ្លាស់ប្តូរ )

រូប Twitter

អ្នក​កំពុង​បញ្ចេញ​មតិ​ដោយ​ប្រើ​គណនី Twitter របស់​អ្នក​។ Log Out /  ផ្លាស់ប្តូរ )

រូបថត Facebook

អ្នក​កំពុង​បញ្ចេញ​មតិ​ដោយ​ប្រើ​គណនី Facebook របស់​អ្នក​។ Log Out /  ផ្លាស់ប្តូរ )

កំពុង​ភ្ជាប់​ទៅ​កាន់ %s

<span>%d</span> bloggers like this: