1 មតិ

ទី​បំផុតចង្រ្កៀង​ខ្ញុំ​ក៏​មាន​ប្រេង

ចង្កៀង​ខ្ញុំ ប្រេង​មិនមាន​ពេញ ពេល​ខ្លះ សល់​កន្លះ ​ពេល​ខ្លះ​ សល់​ដល់​បាត។​ បើ​មិន​ចឹង​ទេ មាន​តែ​កំពប់​​ខាត​អស់។

មួយ​ឃ្លា​ខាង​លើ អាន​យល់​ទេ ថា​ខ្ញុំ​ចង់​ប្រៀប​ប្រដូច​ទៅ​នឹង​អ្វី? មិន​ចង់​បត់​បែន​ឆ្ងាយ ខ្ញុំ​គ្មាន​សំដៅ​អ្វី​ ក្រៅ​ពី​កម្លាំង​ចិត្ត​ក្នុង​ការ​រស់​នៅ​។

ខ្ញុំ​ពិត​ជា​ខ្សោយ​មែន ពិត​ជា​ទន់​ជ្រាយ​មែន ហើយ​​ឥឡូវ​កាន់​តែ​ធ្វើ​ខ្លួន​ឲ្យ​យ៉ាប់ទៅៗ​ ជា​ពិសេស​ក្លាយ​ជា​មនុស្ស​គេច​វេស​ មិន​ចង់​ប្រឈម មិន​ចង់​ទទួល​ខុស​ត្រូវ​។

ការ​ពិត មិន​ចង់​បែប​ហ្នឹង​នោះ​ទេ តែ​មក​ពី​ខ្ញុំ​មិន​ចូល​ចិត្ត​បង្ខំ​ខ្លួន​ធ្វើ​អ្វី​ដែល​មិន​ចង់។ មនុស្ស​ខ្ញុំ​រឹង​ណាស់ ចចេស​ណាស់។ ខ្ញុំ​មិន​ចូល​ចិត្ត​ការងារ​ដែល​កំពុង​ធ្វើ។ ការងារ​ជា​គណនេយ្យ ហ៊ឹម… ខ្ញុំ​អាណិត​ខ្លួន​ឯង​ណាស់ ហេតុ​អី​ក៏​អ្វី​ដែល​ស្អប់ ចូល​ចិត្ត​តែ​ជំពប់​លើ? ខ្ញុំ​មិន​ចង់​តែ​ម៉ាង៉ៃៗ អង្គុយ​តែ​ឆែក​នេះ​ឆែក​នោះ រក​តែ​កំហុស​របស់​គេ​នោះ​ទេ។ ធុញ! តើ​ខ្ញុំ​ជា​មនុស្ស​ចូល​ចិត្ត​ចាប់​កំហុស​គេ​ឬ? អត់​ទេ! បើ​ពូកែ​ជួយ​លាក់​កំហុស​ឲ្យ​គេ ខ្ញុំ​គិត​ថា ខ្ញុំ​ជា​មនុស្សបែប​នេះ​ត្រូវ​ជាង​ ព្រោះ​ដឹង​ហើយ អត់​ចូល​ចិត្ត​និយាយវែង​ឆ្ងាយ​។

បើ​ធ្វើ​ជា​មនុស្ស​ល្ងង់ ខ្ញុំ​ពូកែ តែ​បើ​ធ្វើ​ជា​មនុស្ស​ឆ្លាត ខ្ញុំ​ល្ងង់។​ ពាក្យ​ម៉ា​ម៉ាត់នេះ ខ្ញុំ​មិន​ដឹង​ថា​​វា​ពិត​ក៏​អត់ ព្រោះ​ខ្ញុំ​ពិត​ជា​មិន​ដឹង​មែន តើ​អ្វី​ទៅ​ជា​មនុស្ស​ល្ងង់ តើ​អ្វី​ទៅ​ជា​មនុស្ស​ឆ្លាត ព្រោះ​វា​គ្រាន់​តែ​ជា​ការ​ឲ្យ​តម្លៃ​ទៅ​តាម​ផុ្នត់​គំនិត​របស់​មនុស្ស​ដែល​ស្គាល់​ខ្ញុំ​តែ​ប៉ុណ្ណោះ។​

រយៈ​ពេល​ពីរ​បី​ខែ​នេះ ខ្ញុំ​ពិត​ជា​ប្រទាញ​ប្រទង់​មែន។ អ្វី​ដែល​ចង់​ធ្វើ បែរ​ជា​មិន​អាច តែ​មិន​ចង់ បែរ​ជា​រត់​រក។​ ដោយ​នឹក​ថា​ចង់​រក​លុយ​​ឲ្យ​បានច្រើនៗ ក៏​បង្ខំ​ចិត្ត តើ​នរណាដឹង ថា​ចង់​ចាប់​ត្រី​ដៃ​ពីរ ក្នុង​ពេល​តែ​មួយ វា​ពិបាក? ឈឺ ហត់​នឿយ បាក់​កម្លាំង​ចិត្ត ឯ​ការងារ​ក៏​មិន​រលូន​ទៀត ព្រោះ​ពេល​ខ្លះ​ មាន​អារម្មណ៍​ថា​ខ្លួន​ឯង​ធ្វើ​ការ​ជា​មនុស្ស​យន្ត គេ​ឲ្យ​ធ្វើ​អី​ធ្វើ​ហ្នឹង គ្មាន​សិទ្ធិ គ្មាន​យោបល់​… បរាជ័យ ជា​ពាក្យ​ដែល​ខ្ញុំចង់​សរសេរ​ដាក់​នឹង​ថ្ងាស​ប្រាប់​មនុស្ស​គ្រប់​គ្នា​ថា ខ្ញុំ​បរាជ័យហើយ ហើយ​ខ្ញុំ​ក៏​មិន​ចង់​ធ្វើការងារ​នោះ​ទៀត​ដែរ។ គឺ​ខ្ញុំ​ធុញនឹង​ឮពាក្យ “No need to know” ពាក្យ​ដោះ​សារ និង​ពាក្យ​មិន​ទទួល​ខុស​ត្រូវ​​។​

ទី​បំផុត​ ខ្ញុំ​ក៏​ភ្ញាក់​ថា ការងារ​ជោគ​ជ័យ នៅ​សម័យ​នេះ នៅ​សង្គម​នេះ មិន​មែន​សំខាន់​មក​ពី​ការ​ខិត​ខំ​ប្រឹង​ប្រែង និង​ការ​ស្មោះ​ត្រង់​ជា​ចំបង​នោះ​ទេ តែសំខាន់​លើ​ការ​ទំនាក់​ទំនង។ ប្រ​សិន​បើ​អ្នក​ជា​មនុស្ស​ពូកែ​​សម្តី ពូកែ​អែប​អប និងចាក់​បណ្តោយហៃ​អើៗនោះ ខ្ញុំ​គិត​ថា អ្នក​មាន​អាទិភាព​ហើយ ក្នុង​ជីវិត​ការងារ ព្រោះ​​អ្នក​ណា​ក៏​ដូច​អ្នក​ណា ចូល​ចិត្ត​ផ្អែម ចូល​ចិត្ត​ស៊ីជោរ ចូល​ចិត្ត​​ឲ្យ​​យល់​ស្រប​តាម​គំនិត​របស់​ខ្លួន។ ដូច្នេះ ខ្ញុំ​ចង់​សរុប​ម្តង​ទៀត ខ្ញុំ​ជា​មនុស្ស​បរាជ័យ​នឹង​ការងារ ព្រោះ​ដោយ​សារ​តែ​ភាព​ស្ងាត់​ស្ងៀម​របស់​ខ្លួន ហើយ​ការ​ខិត​ខំ​ប្រឹង​ប្រែង ការ​លះ​បង់ និង​ភាព​ស្មោះ​ត្រង់​របស់​ខ្លួន ខ្ញុំ​គិត​ថា​កន្លែង​ដែល​សាក​សម ​មាន​តែ​ប្រើ​សម្រាប់​ធ្វើការ​​ឲ្យ​ខ្លួន​ឯង​ប៉ុណ្ណោះ​។​

មនុស្ស​ល្អត្រូវ​បានពិន័យ មនុស្ស​អែប​អបត្រូវ​បាន​តម្កើង ហ៊ឹម… ខ្ញុំ​តឹង​ទ្រូង​ណាស់ ឲ្យ​តែ​ឃើញ​បែប​នេះ​ម្តងៗ… ហើយ​ក៏​ស្អប់​ខ្លួន​ឯង​ណាស់​ដែរ ដោយ​សម្តី​របស់​ខ្លួន​ គេ​ស្តាប់​ទៅ​ប្រហើរ​ចោល គ្មាន​ប្រសិទ្ធ​ភាព បាន​តែ​ហៃអើៗ​… មិន​ស្តាប់​ខ្ញុំ ដោយ​សារ​តែ​ខ្ញុំ​មិន​ពូកែ​សម្តី ឬ​ក៏​ខ្ញុំ​មិន​ចេះ​អែប​អប?

ហ៊ឹម! តឹង​ទ្រូង​ណាស់! តើ​ខ្ញុំ​នៅ​អាល័យ​អ្វី​ទៀត?

ការងារ​ជា​គណនេយ្យ ត្រូវ​តែ​ជម្រះ​ចេញ​ចោល​ឲ្យ​អស់។ ខ្ញុំ​ត្រូវ​តែ​ឈប់​ឲ្យ​បាន ព្រោះ​ខ្ញុំ​ជា​មនុស្ស​មានះ ខ្ញុំ​មិន​ចូល​ចិត្ត​បង្ខំ​ខ្លួន​ធ្វើ​អ្វី​ដែល​ខ្លួន​មិន​ចង់​នោះ​ទេ។​

ដូច្នេះ អ្វី​ដែល​ខ្ញុំ​គួរ​ធ្វើ​នៅ​ពេល​នេះ មាន​តែ​ចាក់​ប្រេង​នៅ​ក្នុង​ចង្កៀង​ឲ្យ​បាន​ពេញ ហើយ​សួរ​ខ្លួន​ឯង​ថា ចង្កៀង​ខ្ញុំ​ តើ​វាបញ្ឆេះឡើង ដើម្បី​អ្វី? បើ​ដឹង​ហើយ តើ​ពេល​ណា​ ទើប​ចាក់​ប្រេង? តើ​ពេល​ណាទើប​បញ្ចេញ​ពន្លឺ​របស់​ខ្លួន ឲ្យ​គេ​ដឹង​ថា ទោះ​បី​យើង​គ្រាន់​តែ​ជា​ចង្កៀង​ប្រេង យើង​ក៏​មានសោភណ​នៃ​ពន្លឺ​របស់​ខ្លួន​ដែរ មិន​ចាញ់​អំពូល​ម៉ែត្រ អំពូល​ទីក្រុង​ឡើយ?

Fighting!

//

//

One comment on “ទី​បំផុតចង្រ្កៀង​ខ្ញុំ​ក៏​មាន​ប្រេង

  1. អាត្មា​ឃើញ​មា​ន​រឿង​ស្រដៀង​អាត្មា​ ដូច្នេះ​សូម​ចែករំលែកបទពិសោធន៍​ខ្លះ!

    ១/.ពិត​ណាស់​ថា​មនុស្ស​ម្នាក់ៗ​សុទ្ធ​តែ​ចង់​ធ្វើ​ការងារ​ដែល​ខ្លួន​ស្រលាញ់ ខ្លួន​ពេញ​ចិត្ត ប៉ុន្តែ​មនុស្ស​ខ្លះ​ក៏​បាន​ដូច​បំណង​ប្រាថ្នា ឯអ្នក​ខ្លះ​ទៀត​ក៏​មិន​បាន​ដូច​ការ​ប៉ង​ប្រាថ្នា​នៅ​ឡើយ ហើយ​អាត្មា​ភាព​ក៏​ស្ថិត​នៅ​ក្នុង​មនុស្ស​ក្រុម​ទីពីរ​នេះ​ដែរ ប៉ុន្តែ​អាត្មា​តែ​ងតែ​ប្រាប់​ខ្លួន​ឯង​ថា​«ធ្វើ​ការ​ងារ​ដែល​ខ្លួន​ស្រលាញ់​ធ្វើ​ឲ្យ​យើង​រីក​រាយ​ចិត្ត​ចិត្ត មាន​ក្តី​សុខ ហើយ​ឆាប់​បាន​ជោគជ័យ ប៉ុន្តែ​បើ​ធ្វើ​ការ​ងារ​ដែលខ្លួន​យើង​មិន​ពេញ​ចិត្ត​ធ្វើ​ឲ្យ​យើង​ចេះ​អត់​ធ្មត់»។​យើង​សាកស្រម៉ៃ​មើល ប្រសិន​បើ​យើង​ជួប​រឿង​ដែល​យើង​ពេញ​ចិត្ត​ចិត្ត​រហូតនោះ​ តើ​ជីវិត​មាន​ន័យ​ឬទេ? ហើយ​ម្យ៉ាងវិញ​ទៀត​ថ្ងៃ​ណា​មួយពេល​ជួប​រឿង​មិន​ពេញ​ចិត្ត​អ្វីមួយ​ចាប់​ផ្តើម​ធ្វើ​មិន​កើត​ ខ្វះការអត់ធ្មត់​ ហើយ​ក៏បោះបង់​ ហើយ​នាំ​ឲ្យ​បរាជ័យ ព្រោះ​ធ្លាប់​ជួប​តែ​រឿង​ពេញ​ចិត្ត។ ផ្ទុយ​មកវិញ​បើ​យើង​ជួប​រឿង​មិន​ពេញ​ចិត្ត​ខ្លះ​ យើង​ស្គាល់​ការ​អត់​ធ្មត់​ លុះ​ដល់​ថ្ងៃ​មួយ​ដែលយើង​ជួប​ការ​ងារដែល​យើង​ពេញ​ចិត្ត​ហើយ ឧបសគ្គ​បន្តិច​បន្តួច​យើង​អាច​អត់​ធ្មត់​បាន ព្រោះ​យើង​ធ្លាប់​ឆ្លងកាត់​វា​ឡើងឆ្អែត​ឆ្អន់​រួច​ហើយ។ សូក្រាត​និយាយ​ថា​«រៀប​ការ​ទៅ បើ​អ្នក​បាន​ប្រពន្ធ​ល្អ​ អ្នក​មាន​សុភមង្គល បើ​អ្នក​បាន​ប្រពន្ធ​មិន​ល្អ​ នឹង​ធ្វើ​ឲ្យ​អ្នក​ក្លាយ​ជា​ទស្សនវិទូ» ​មួយ​ទៀត «When you change the way you look at thing, the thing you look at change»។ សូម​កាត់​យល់ចុះ!

    ២/. អាត្មា​ក៏​មិ​នចូល​ចិត្ត​អ្នក​អែបអប​ដែរ ហើយ​ចេះ​តែ​គិត​ថា​ពិភព​លោក​នេះ​ហាក់​ដូច​ជា​អយុត្តិធម៌ចំពោះ​មនុស្ស​ដែល​មាន​សមត្ថភាព​ដែល​មិ​ន​សូវ​ចេះ​មាត់​ករ ប៉ុន្តែ​ក្នុង​ពេល​ដំណាល​គ្នា​នោះ​ដែរ​ អាត្មា​បាន​តាំង​ចិត្ត​ថា​និង​កែប្រែទស្សនៈចាស់​គំរឹល​នេះ​ឲ្យ​ទាល់​តែ​បាន នៅ​ពេល​ណា​ដែល​បាន​ទៅ​ដល់​ទី​ខ្ពស់។ អាត្មា​សូម​ឲ្យ​យើង​ចេះ​ចាប់​ផ្តើម​មាន​ទស្សនវិជ្ជា​ក្នុង​ជីវិត​ហើយ​ចិញ្ចឹម​វា​ឲ្យ​ធំលូត​លាស់​ឡើង។ បើ​យើង​ក្រោក​ឈរ​ដើម្បី​បុព្វហេតុ​ត្រឹមត្រូវ​ ចូរក្រោក​ឈរ​ឡើង​ទោះ​បី​ជា​ក្រោក​ឈរ​ម្នាក់​ឯងក៌ដោយ មាគ៌ាដែលល្អ​ទោះ​គ្មាន​អ្នក​កំដរក៏ត្រូវ​តែ​ទៅ។ «បំលែងការឈឺចាប់​ឲ្យ​ទៅ​ជា​ថាមពេល»។ សូម​អរគុណ! សរសេរ​ច្រើន​បន្តិច​ហើយ​ព្រោះ​តែ​ចង់​ឲ្យ​គេ​យល់!

ឆ្លើយ​តប

Fill in your details below or click an icon to log in:

ឡូហ្កូ WordPress.com

អ្នក​កំពុង​បញ្ចេញ​មតិ​ដោយ​ប្រើ​គណនី WordPress.com របស់​អ្នក​។ Log Out /  ផ្លាស់ប្តូរ )

Google photo

អ្នក​កំពុង​បញ្ចេញ​មតិ​ដោយ​ប្រើ​គណនី Google របស់​អ្នក​។ Log Out /  ផ្លាស់ប្តូរ )

រូប Twitter

អ្នក​កំពុង​បញ្ចេញ​មតិ​ដោយ​ប្រើ​គណនី Twitter របស់​អ្នក​។ Log Out /  ផ្លាស់ប្តូរ )

រូបថត Facebook

អ្នក​កំពុង​បញ្ចេញ​មតិ​ដោយ​ប្រើ​គណនី Facebook របស់​អ្នក​។ Log Out /  ផ្លាស់ប្តូរ )

កំពុង​ភ្ជាប់​ទៅ​កាន់ %s

<span>%d</span> bloggers like this: