5 មតិ

នុយ​ជីវិត​

១ កុម្ភៈ ២០១២

«លុយៗៗ! លុយ​ទិញ​ស្នេហា…» នេះ​ជាចម្រៀង​មួយ​ឃ្លា ដែល​ដក់​ជាប់​នៅ​ក្នុង​សោតា​របស់​​ខ្ញុំ តែ​ខ្ញុំមិនដឹងថា នរណា​ជា​អ្នក​ច្រៀង ហើយ​ក៏​មិន​ដឹង​ថា វា​មាន​ចំណង​ជើង​ថា យ៉ាង​​ម៉េច​នោះ​ដែរ។ និយាយ​ពី​ចម្រៀង ខ្ញុំ​ចប់សូន្យសឹង។ មិន​ចេះ​ច្រៀង ហើយ​ក៏​មិន​ចេះ​ស្តាប់ដែរ។ តើ​ចម្លែក​ណាស់​ឬ?​ សង្ឃឹម​ថា​ មិន​ចម្លែក​ទៅ​ចុះ។​

អីយ៉ាស់! ខ្ញុំនិយាយ​ខុស​ប្រធាន​បទ​ហើយ ដូច្នេះសុំ​បក​មក​និយាយ​ពី​«នុយ​ជីវិត​» ដែល​ខ្ញុំ​ចង់​​​យក​​​​មក​ចែក​រំលែក​ជាមួយ​​អ្នក​ទាំង​អស់​គ្នា​​វិញម្តង។

«នុយ​ជីវិត» គឺ​ជា​កំណាព្យមួយ​បទ ​តែង​ដោយលោក​ លីម ចំរើន ក្នុង​«បទ​​ក្រប​​ចក្រ​​វាឡ​​ មេ​​ពាក្យ​​​១២​ថ្មី» ដែល​​មេកាព្យ​ថ្មីនេះ លោក​បាន​​បំបែក​ក្បួន​​​ចេញ​ពី​ «បទ​ក្រប​ចក្រវាឡ​ មេពាក្យ​​៩»​របស់លោក​គ្រូ​ អៀង​ សាយ។

ពេល​បាន​អាន​កំណាព្យ​នេះ វា​ប្រៀប​ប្រដូច​ទៅ​នឹង​​កញ្ចក់​មួយផ្ទាំង​ ដែល​បាន​ឆ្លុះ​បញ្ចាំង​ពី​តថភាព​​សង្គម​ ដែលរំលឹកដល់បុគ្គលិក​ ​មន្ត្រី​រាជការ និង​មនុស្ស​ដទៃទៀត ដែល​កំពុង​តែចូលរួម​បដិភាគ​យ៉ាង​ធំធេង ក្នុង​ការ​ធ្វើ​ឲ្យ​សង្គម សំបូរ​ទៅដោយ​អំពើ​ពុក​រលួយ​គ្រប់​កន្លុក​កន្លៀត​​ បូក​រួម​ទាំង​​ភាព​អមនុស្ស​ធម៌​ និង​ភាពកាច​សាហាវ​យ៉ង់​ឃ្នង មិន​យល់​ញាតិ លែង​ស្គាល់បុណ្យ​ បាប ខុស​និង​ត្រូវ… ដែល​នេះ​ ដោយ​សារ​តែ​បទបញ្ញត្តិមួយ ​ដែល​មនុស្ស​ទាំង​នោះ​​ តែងឲ្យ​តម្លៃថា​៖ «ឲ្យ​តែ​មាន​លុយ គឺ​មាន​អ្វីៗទាំង​អស់ ចង់​ប្រើ​ឲ្យ​ខ្មោច​កិន​ម្សៅ ក៏​បាន​ដែរ»។

ហ៊ឺម!!!! និយាយដល់​លុយ លុយ​ គ្រាន់​តែ​ជា​ក្រដាស​​តូច​មួយ​សន្លឹក​ប៉ុណ្ណោះ​ ដែល​គេ​បញ្ញត្តិ​ ជា​របស់​ សម្រាប់​យក​ទៅ​​ដោះ​ដូរ​ជា​មួយ​នឹង​របស់​ផ្សេងៗ។ ហេតុ​អ្វី​បាន​ជា​មនុស្ស​ភាគ​ច្រើន​ នាំ​គ្នា​ឆ្កួត​វង្វេង កើត​ទុក្ខ​វេទនា ​ដោយ​សារ​តែវា។ បើ​គ្មាន​លុយ តើ​មនុស្ស​​អាច​រស់​បាន​ទេ? (ពិត​ជា​បាន បើ​សិន​ណា នៅ​លើ​លោក​នេះ គេមិន​ចាយ​លុយ… ហាហា…)

មុន​នឹង​ឃ្លាត​ គឺ​គ្មាន​ស្អី​ច្រើនទេ គ្រាន់​តែចង់​យក​មកបទ​នេះ​មក​ចែក​រំលែក និង​ចង់​យក​មក​​ធ្វើ​ជា​លេសផង ដើម្បី​រំសាយ​អារម្មណ៍​របស់​ខ្លួន​មួយ​គ្រា។ អារម្មណ៍​របស់​ខ្ញុំ នៅ​ពេល​នេះ គឺ​ខ្ញុំ​ស្អប់​លុយ!

នុយជីវិត

នុយជីវិត​ ពិតគឺលុយ ស្អុយកេរ្តិ៍ឈ្មោះ ព្រោះតែវា

មនុស្សម្នា ជាទម្លាប់​ ជាប់ទង្វើ​ ធ្វើអាស្រូវ

ខ្លះប្រើស្នៀត ឆ្លៀតកិបកេង លេងល្បិចកល ខ្វល់គ្រប់ផ្លូវ

បង្វែរត្រូវ ទៅជាខុស ដុះចិត្តយក្ស លាក់ស៊ីសូក។

អ្នកខ្លះញ៉ាម តាមស៊ីនុយ លុយពង្វក់ លក់អាត្មា

បាត់មនសិការ ថាឡប់ឡែ កែខ្មៅស ល្អទៅមក

ភ្លេចបុណ្យបាប សាបប្រែប្រៃ​ ថ្លៃប្រែថោក សោកពួនជ្រក

គិតស្មោកគ្រោក យកប្រៀបគ្នា ជាទម្លាប់​ ជាប់ប្រចាំ។

ទោះបងប្អូន កូនឪម៉ែ ប្រែលែងស្គាល់ ញ័រឃ្លាននុយ

ឆ្កួតរពុយ លុយនេះហើយ ឲ្យឆោតល្ងង់ លង់ល្បែងកម្ម

ពៀរមិនខ្លាច កាចថោកទាប ធៀបឆ្ងាញ់នុយ លុយប្រចាំ

ដូចដេកត្រាំ ចាំទុក្ខមក ជ្រកផ្តល់ផល ខ្វល់មិនស្វាង។

បើយើងយល់ គល់បញ្ហា ថាអាលុយ​ នុយជីវិត

ប្រឹងទប់ចិត្ត ពិតសប្បាយ កាយផុតគ្រោះ ព្រោះសំណាង

លុយគ្មានន័យ អ្វីសោះឡើយ ឲ្យយើងឆ្កួត អួតមិនស្វាង

គួរឈប់កាង សាងទង្វើ ធ្វើសុចរិត ពិតមង្គល៕

5 comments on “នុយ​ជីវិត​

  1. កំណាព្យនេះ​មានអត្ថរស និងអត្ថន័យល្អណាស់…។ ដោយពិត​ទៅ ខ្ញុំ​អស់​ចេះ​តែង​កំណាព្យសោះ… រៀន​យ៉ាង​ម៉េច​​​ក៍មិនចេះ​ដែរ ឬក៍​អាច​ថា​មិន​យកចិត្ត​ទុក​ដាក់​ ក៍​ថាបាន… ព្រោះ​កាល​នៅ​រៀន​ ខ្ញុំឧស្សាហ៍​បង្អាប់​មិត្តភក្តិ​ខ្ញុំ​ថា៖ អាណាពូកែតែងកំណាព្យ អាណឹង​ថ្ងៃក្រោយ​ពូកែ​ញ៉ែ​ស្រីៗ​ដែរ…។ ដល់​ដើរ​ថា​អោយ​គេ​ទៅ ខ្លួន​ឯង​ខ្ជិល​យក​ចិត្ត​ទុក​ដាក់​ផ្សំផង ក៍​អត់ចេះ​រហូត​ដល់​សព្វ​ង៉ៃ​នេះ​ទៅ…

  2. ឡូយមែនអា ពៅជួយ(ឡង់សេ)ឲ្យបងពូកែមែនខាងអត្ថាធិប្បាយពីរោះណាស់។បងឥលូវអារម្មណ៍អស់បាត់ ហើយមិនចេះសរសេរកណាព្យទៀតទេ។វាមិងដឹងថាអារម្មណ៍ទៅណាទេ។
    ខ្ញុំសូមអរគុណណាស់មិត្តអ្នកអានគ្រប់គ្នាដោយស្មោះអស់ពីពោះពិសេស គឺអាយុក។

    • បង​ចំរើន! ម្តង​ហៅ​ខ្ញុំថា​អាពៅ​ផង​​​ ម្តង​អាយុក​ផង ខ្ញុំ​ចង់​វង្វេង​ម្តងៗ​ហើយ!
      អារម្មណ៍​របស់​បង​ បើ​ហោះ​ទៅ​ណាបាត់​ អត់​អី​ទេ ចាំ​ខ្ញុំយក​សំណាញ់​មេឃាមក​ចាប់​វា​ឲ្យ…. ហាហា

  3. អ្នកខ្លាហានមកពីភ្នំថៃសាន្តសូមចូលរួមផង
    វាចាថ្លាថ្លែង ដែលអ្នកសម្តែង គួរឲ្យចាប់ចិត្ត
    ឮថាមិនចេះ កំណាព្យល្អពិត សូមអ្នកជាមិត្ត
    ពិនិត្យច្បាប់ក្បួន។

ឆ្លើយ​តប

Fill in your details below or click an icon to log in:

ឡូហ្កូ WordPress.com

អ្នក​កំពុង​បញ្ចេញ​មតិ​ដោយ​ប្រើ​គណនី WordPress.com របស់​អ្នក​។ Log Out /  ផ្លាស់ប្តូរ )

Google photo

អ្នក​កំពុង​បញ្ចេញ​មតិ​ដោយ​ប្រើ​គណនី Google របស់​អ្នក​។ Log Out /  ផ្លាស់ប្តូរ )

រូប Twitter

អ្នក​កំពុង​បញ្ចេញ​មតិ​ដោយ​ប្រើ​គណនី Twitter របស់​អ្នក​។ Log Out /  ផ្លាស់ប្តូរ )

រូបថត Facebook

អ្នក​កំពុង​បញ្ចេញ​មតិ​ដោយ​ប្រើ​គណនី Facebook របស់​អ្នក​។ Log Out /  ផ្លាស់ប្តូរ )

កំពុង​ភ្ជាប់​ទៅ​កាន់ %s

<span>%d</span> bloggers like this: